Trader, 1 pa arestado sa iligal na notary
MANILA, Philippines — Isang negosyante at tauhan nito ang dinakip sa isinagawang entrapment operation ng mga tauhan ng Caloocan City Police kamakalawa sa nabanggit na lungsod.
Batay sa report na tinanggap ni Acting Northern Police District Director PBGen. Arnold Abad, bandang ala-1:30 ng hapon nitong Huwebes sa West Grace Park, Brgy. 71, Caloocan City.
Nag-ugat ang operasyon sa reklamo ng isang 81-anyos na abogado na umano’y ginagamit ang kanyang pangalan, dry seal at pirma sa pagnonotaryo.
Nabatid na bago ang police operation, nagsagawa muna ng beripikasyon at surveillance ang mga pulis hanggang sa ikasa ang entrapment operation kung saan isang pulis ang nagsilbing poseur-client at nagpanotaryo sa mga suspek.
Nang magpositibo, agad na inaresto ang mga suspek at kinumpiska ang mga gamit sa pagnonotaryo kabilang ang acknowledgment receipt, dalawang pekeng Affidavit of Loss of Driver’s License na may pangalan at dry seal ng isang Atty. Valmores, metal dry seal, apat na iba’t ibang rubber stamps, bundle ng blank acknowledgment receipts na may pangalan ng complainant at notarial registration book.
Nahaharap ang mga suspek sa paglabag sa Article 177 (Usurpation of Authority), Article 315 (Estafa through Other Deceit), at Article 172 (Falsification by Private Individuals) ng Revised Penal Code.
Sinabi naman ni National Capital Region Police Office (NCRPO) chief PMajor Gen. Anthony Aberin, ang pagkakahuli sa mga suspek ay bunsod ng pinaigting na kampanya upang mapanatili ang peace and order sa Metro Manila.
- Latest
