2-anyos hinostage sa palengke, suspek timbog

MANILA, Philippines — Arestado ang isang lalaki nang i-hostage ang isang 2-anyos na batang babae sa Bulu­ngan market, Barangay La Huerta, Parañaque City, nitong Linggo.

Nakapiit na sa Parañaque Police Custodial facility ang suspek na nahaharap sa mga reklamomg Serious Illegal Detention, Child Abuse, Alarm and Scandal, at Illegal Possession of Bladed Weapon.

Tagumpay na nailig­tas ang bata habang su­gatan naman si Patrol­man Samuel Melad, miyembro ng Parañaque Law Enforcement Team, nang humablot sa pata­lim ng suspek.

Naganap ang insi­dente pasado alas-12:00 ng tanghali nitong Linggo, Abril 13, sa Bulungan market.

Sa kuha ng CCTV, isang lalaki na armado ng kutsilyo ang may bitbit na bata at galit na galit na naghahamon sa mga taong naka-uusyoso.

Sa pagresponde ng mga pulis, nagkaroon ng isang oras na negosasyon hanggang sa makakuha ng tiyempo at dinamba ang suspek. Dito na nahawakan ni Pat. Melad ang kutsilyo ng suspek.

Lumilitaw na una uma­nong pinagtripan ng suspek ang ama ng bata na tumakbo at nasaksihan ng mga kaanak ang pag­bitbit naman sa anak nito.

Sinabi ni Police Lieu­tenant Mardison Perie, Team Leader ng Parañaque Law Enforcement Team, na hindi tagaroon ang suspek.