CTR All-Stars miwani sa NCAA/UAAP selection

CEBU, Philippines — Ang Chase Tower Runs (CTR) All-Stars miwani sa NCAA/UAAP selection, 106-91, atol sa ilang basketball exihibition match didto sa Cokaliong Tower ning bag-ohay pa lamang.

Ang eksplosibong trianggulo nilang Froilan Mangubat, Jancork Cabahug ug Shane Menina maoy nangu sa CTR ni Chase Cokaliong ngadto sa 15 puntos nilang pagpayaka sa dekalibre sab nilang mga karibal.

Si Mangubat mipabuto og 24 puntos, samtang si Cabahug miharos og 22 puntos, walo ka rebounds ug tulo ka assists.

Midugang si Menina og 20 puntos, tulo ka rebounds ug upat ka assists alang sa CTR, nga milusad og bagsik nga ataki sa second half aron patikalbongon ang NCAA/UAAP team.

Ang CTR nabiyaan og 13 puntos, 32-45, sa sayong bahin sa ikaduhang kuwarter apan impresibong miresbak ang mga batos ni coach Paul Joven sa ikatulong kuwarter aron ilogon ang labaw, 79-76, lahos na ngadto sa pagpaluhod sa ilang kontra.

Sila si Jerome Napao ug Sean Quiteves nagkumboya'g 27 puntos sa balanseng opensiba sa CTR.

Si Nic Cabañero maoy nangu sa NCAA/UAAP selection uban ang 25 puntos, tulo ka rebounds ug upat ka assists.

Sila si Jared Bahay ug John Galinato nagkumbinar og 27 puntos samtang si RR Pogoy mitali og 12 puntos sa pilderong kawsa.