Alegado Invitational Cup UV, UP Cebu mag-ilog sa kampiyonato
CEBU, Philippines — Ang University of the Visayas (UV) Green Lancers ug ang University of the Phippines (UP) Cebu Fighting Maroons mitagak sa ilang mga karibal hinungdan nga sila maoy mag-ilog sa titulo sa labing unang Mayor Teresa Alegado Invitational Cup Inter-Collegiate Basketball Tournament didto sa Consolacion covered court.
Ang kasamtangang MVP sa Cebu Schools Athletic Foundation, Inc. (CESAFI) nga si Kent Ivo Salarda mitagak og 19 puntos sa dihang gitumba sa Lancers ang University of San Carlos (USC) Warriors, 83-78, aron paglukat og ticket sa finals. Sila si AJ Sacayan ug Raul Gentallan nagkumboya'g 22 puntos alang sa Lancers nga makigharong sa Fighting Maroons sa kampiyonato.
Luyo sa mainit nga mga kamot nilang Jose Zaldy Dizon, Matt Flores ug Brandon Sainz, ang UP Cebu mi-abante human gipalagpot ang University of Southern Philippines Foundation (USPF) Panthers, 92-89.
Si Dizon mipabuto og 23 puntos, si Flores mi-iskor og 20, samtang si Sainz midugang og 16 puntos alang sa Fighting Maroons.Samtang sa pagsulat ning taho kagabii, ang UV ug UP Cebu nagpinaksitay pa alang sa korona.
Ang modaog mobulsa og P100,000 nga premyo, samtang ang pildero dili magmahay kay makadawat og P50,000.
- Latest
