Lider ng armed robbery group, utas sa sekyu

MANILA, Philippines — Patay ang isa sa limang lalaking nangholdap sa isang fruit store nang mabaril ng security guard, habang isa ang naaresto at tatlo pa ang nakatakas, kahapon ng madaling araw sa Makati City.

Kinilala ang nasawi na si alyas “Jeric”, 27, sinasabing lider ng notoryus na Brondial Criminal Group.

Sa ulat na isinumite kay Southern Police District (SPD) Director P/ Brig. Gen. Leon Victor Rosete, naganap ang insidente bandang alas-2:50 ng madaling araw sa Barangay San Isidro, Makati City.

Sa inisyal na imbestigasyon, puwersahang pinasok ng mga armadong suspek ang tindahan at nagdeklara ng holdap.

Dalawa sa mga armadong suspek ang pumunta sa ikalawang palapag habang ang natitirang tatlo ay nanatili sa ground floor, kung saan nakuha ang mga cellphone ng sekyu at iba pang empleyado ng tindahan.

Nataranta ang mga suspek nang biglang makarinig ng sirena ng pulis kaya mabilis na tumakas subalit si Jeric ay nagawang barilin ng nakatalagang security guard..

Kabilang sa hawak na ebidensya ng pulisya ang baril ng suspek at dalawang motorsiklo.

Sa beripikasyon, si Jeric ang lumalabas na lider ng naturang grupo at natukoy din na may nakabinbing standing warrants of arrest sa mga kasong carnapping, murder at robbery.

Batay sa kuha ng CCTV, ang guwardiya na unang nakitang nakadapa ay nakakuha ng tiyempo kaya nanlaban sa limang holdaper at isa ang kaniyang tinamaan na agad na nasawi.