Ex-convict kinatay sa Quezon City

MANILA, Philippines — Isang ex-convict ang pinagsasaksak hanggang sa mapatay ng isang ‘di kilalang lalaki, kamaka­lawa ng gabi sa Quezon City.

Dead-on-the-spot ang biktimang inilarawan na nasa edad 30-35, may taas na 5’5, balingkinitan, at may tattoo na “Ratos Locos” sa dibdib, at “Jhoed Bahala na Gang” sa kanang balakang.

Itinuturo namang suspek ang isang nagnga­ngalang “Lakay” na nasa 35-40 anyos at payat ang pangangatawan na agad tumakas matapos ang ginawang pagpatay.

Batay sa imbestigasyon ni PCpl. Jordan Barbado ng Quezon City Police District-Criminal Investigation and Detection Unit (QCPD-CIDU) nangyari ang insidente dakong alas-10:30 ng gabi sa harap ng isang supermarket sa panulukan ng EDSA at K-10, Barangay West Kamias, Quezon City.

Ayon sa saksing si Jay R Roquino, magkatabi silang nakaupo ng biktima nang biglang lumapit ang suspek at bumunot ng kutsilyo saka walang sabi-sabi pinagsasaksak ang biktima sa katawan hanggang sa bumagsak.

Inaalam pa rin ng pulisya ang motibo sa krimen.