2 miyembro ng ‘Budol-Budol’, timbog
MANILA, Philippines — Dalawang miyembro ng ‘Budol-Budol Gang’ ang nasakote ng mga awtoridad nang ireklamo ng isang negosyante, kamakalawa ng gabi sa Brgy. Maharlika, Quezon City.
Positibong kinilala ng biktimang si Angel Munoz, 34, ang mga suspek na sina Rosalina Soriano, 63 at Michael Remigio,40 kapwa residente ng Peace Village, Antipolo City.
Sa pagsisiyasat ni PCpl Jose Eusebio Banua ng Quezon City Police District-Police Station 1, nangyari ang insidente dakong alas-6 ng gabi kamakalawa sa loob ng Z-Empire Auto Accessories Shop na nasa Don Manuel St., Brgy. Maharlika, Quezon City.
Lumilitaw na nagpakilalang mga empleyado ng Bureau of Internal Revenue (BIR) ang mga suspek at sinabihan ang biktima na aasikasuhin ang kanyang business tax mapped.
Kapalit nito, pinilit ng mga suspek ang biktima na bumili ng umpiang shanghai na nagkakahalaga ng P5,000.
Agad namang nagbigay ng P5,000 ang biktima sa suspek na mabilis ding umalis ng nasabing establisimento.
Dito na naisip ng biktima na nabudol siya ng mga suspek kaya humingi ng tulong sa Brgy. Maharlika at police station.
Makalipas ang ilang minuto, nakalawit ng mga pulis ang mga suspek at nakatakdang sampahan ng kasong Swindling at Usurpation of Authority sa piskalya.
- Latest