Tuluyang pagpapahinto sa PUV modernization igigiit ng Piston

MANILA, Philippines — Nagpapakita lamang umano na pursigido ang pamahalaan sa implementasyon ng PUV mo­dernization kung kaya’t pinalawig pa ng tatlong buwan  ang consolidation.

Ito ang reaksiyon ni Steve Ranjo, secretary general ng transport group na Pinagkaisang Samahan ng mga Tsuper at Operators Nationwide (PISTON) kaugnay sa  pag-extend ni Pangulong Ferdinand Marcos Jr. sa public utility vehicle (PUV) hanggang Abril 30.  Ang PUV consolidation ay requirement  tungo sa PUV modernization.

“Temporary retrieve lang ‘yan sa amin. Pero nangangahulugan lamang ‘yan na pursigido ang Pangulong Marcos na maituloy ang PUV modernization kaya’t kami ay binibigyan ng tatlong buwan pa para mag-consolidate na rin” sabi ni Ranjo.

Binigyang diin nito mas masisiyahan sila kung pabor sa kanila ang ipalalabas na desisyon ng Korte Suprema sa hinain  nila na makapagpalabas ito ng TRO laban sa PUV modernization at consolidation dahil hanggang sa ngayon ay hindi pa malinaw at kailangan pang maliwanagang mabuti ang mamamayan tungkol sa isinusulong na PUV modernization ng gobyerno.

Dapat din anyang ikonsidera ng Korte Suprema sa gagawing desisyon nito ang pahayag ng ilang mambabatas sa Kongreso na hindi kumbinsido sa PUV modernization dahil magdudulot lamang ito ng ‘transport crisis” at maaapektuhan nito ang may 28.5 milyong commuters natiownwide dahil tatanggalin ng programa ang mga tradisyunal na jeep.

Gayunman, sinabi ni Ranjo na patuloy ang kanilang gagawing pagkilos laban sa naturang programa na anila’y magdudulot lamang ng matinding kagutuman sa milyun-milyong mamamayan ng bansa.