Lalaking ipina-barangay, natagpuang patay

MANILA, Philippines — Patay na nang matagpuang lumulutang sa isang estero sa Tondo, Maynila ang isang lalaki na unang ipinabarangay ng kaniyang kinakasama, kamakalawa ng gabi.

Nakilala ang nasawi na si Joel Martinez, 34, ng Inocencio Street, Brgy. 93, Tondo.

Sa ulat ng MPD-Raxabago Police Station 1, dakong alas-7:30 ng Miyerkules ng gabi nang matagpuan ang bangkay ni Martinez na lumulutang sa Estero De Vitas sa C2 Capulong Road, Brgy. 93, Tondo.

Nabatid na unang ipinabarangay ng kaniyang kinakasama si Martinez noong Nobyembre 21 dahil sa pananakit sa kanyang kinakasama.  Hindi na nabanggit kung nagkaayos ang magkarelasyon bago natagpuan ang bangkay ni Martinez.

Patuloy ang imbestigasyon ng pulisya sa sanhi ng pagkamatay ng biktima kung saan inaalam kung may naganap na foul play.  Nakatakdang isailalim ang bangkay nito sa awtopsiya.