Hindi makahanap ng trabaho, nagbigti
MANILA, Philippines - Isang 50-anyos na lalaki na hindi makahanap ng trabaho ang winakasan ang sariling buhay nang magbigti sa loob ng kanyang bahay sa Navotas City, kamakalawa ng gabi.
Sa ulat ng Navotas City Police, dakong alas-8 ng gabi nang madiskubre ang bangkay ni Marvillo Solis, sa kuwarto ng bahay ng kanyang pamilya sa Brgy. North Bay Boulevard South, ng naturang lungsod.
Nabatid na pinasok ng kanyang 70-anyos na ina na si Paquita ang kuwarto ni Marvillo upang ayain itong kumain ng hapunan nang makita ang wala nang buhay na anak na nakabitin. Isinugod pa ang biktima sa pagamutan ngunit hindi na rin ito umabot ng buhay.
Ayon sa mga kaanak, dumaranas ng matinding depresyon ang nasawi dahil sa problema sa kabuhayan ng kanyang pamilya na hindi niya matulungan. Hindi umano matanggap sa mga inaaplayan na trabaho ang nasawi dahil sa edad nito na dahilan ng pagiging bugnutin at balisa.
- Latest
