Makati City hall, iskul sa Quezon City, binulabog ng bomb threat

MANILA, Philippines – Nabulabog ang mga ka­wani ng Makati City at sanda­ling sinuspinde ang operas­yon nito dahil sa natanggap na “bomb threat” kahapon ng umaga sa naturang lungsod.

Ayon kay Richie Rodri­guez­, ng Disaster Risk Reduction Ma­nagement Office, alas-9:56 ng umaga nang mataggap ang “prank call” mula sa hindi kila­lang lalaking caller na nagsabing may sasabog na bomba sa  naturang lugar.

Dahil dito kaagad na pina­labas ang mga kawani sa ka­nila-kanilang tanggapan.

Mabilis namang isinagawa ng pulisya ang inspeksyon sa gusali kung saan nagnegatibo ito sa bomba.

Alas-11:00 ng umaga ay bu­malik naman sa kanilang tra­­baho ang mga kawani at nag­balik normal na rin ang ope­­ras­yon nito.

Samantala, nabulabog  din ang mga mag-aaral at mga guro ng Don Alejandro Roces Sr., Science-Technology High School sa Quezon City matapos ang bantang pagpapasabog sa kanilang paaralan, ka­hapon.

Ayon sa ulat, unang ku­malat sa Facebook, na umikot sa mga estuyante at guro kahapon ng umaga sa pamama­gitan ng text messages, kung saan nakasaad na sa ganap na alas-2 ng hapon ay may ma­gaganap na pagsabog sa na­­sabing paaralan dahil nagsilid sila sa bag ng improvised bomb at ikinalat sa buong pa­aralan. Nagmula ang naturang­ mensahe sa isang nagpakila­lang Kreggo.

Agad namang rumisponde ang tropa ng Quezon City Police District (QCPD) bomb squad, kasama ang ilang K-9 unit at sinimulang inspeksyunin ang nasabing paaralan, dakong alas-6 ng umaga hanggang kalaunan ay napag-ala­mang negatibo ito.

Naniniwala naman si QCPD Acting District Director P/Senior Supt. Guillermo Elea­zar na ang banta ay gawa-gawa lamang ng mga manloloko o walang magawa sa buhay.