MRT-3 station, nakaranas ng brownout

MANILA, Philippines – Nakaranas ng brownout ang Metro Rail Transit (MRT-3) sa Ayala Avenue station, Makati City, kamakalawa ng gabi.

Nabatid mula sa control tower ng MRT-3 na dakong alas-8:30 ng gabi nang mawalan ng supply ng kuryente sa kabuuan ng Ayala station.

Bunsod nito, sumalubong ang mahabang pila mula sa pagbaba at pagsakay ng tren ng mga pasahero ng MRT-3 sa nasabing istasyon.

Nahirapan ay mga matatanda at may kapansanan sa pagsakay ng tren dahil hindi rin gumagana ang mga escalator at turnstile sa istasyon.

Dahil sa nangyari, manu-mano na lamang kinuha ng mga guwardiya ang mga single journey ticket ng mga pasahero habang ang may hawak na stored value ticket ay pinadaan na lamang.

Hindi pa batid kung ano ang dahilan ng pagkawala ng supply ng kuryente na siyang subject ngayon sa ginagawang imbestigasyon ng pamunuan ng Department of Transportation and Communication (DOTC).