Kelot sinalvage, isinilid sa garbage bag

MANILA, Philippines – Isang hubo’t-hubad na bangkay ng lalaki na tad­tad ng saksak ng icepick ang katawan ang natagpuang nakasilid sa isang itim na garbage bag at itinapon sa madilim na bahagi ng Nia Road sa lungsod Quezon, kahapon ng madaling-araw.

Sa ulat ng Quezon City Police District-Criminal Invesitgation Detection Unit (CIDU), ang biktima na walang pakakakilanlan ay isinalarawan sa pagitan ng edad na 25-30,  may taas na 5’1”, may mga tattoo sa katawan tulad ng “Federico Dasig, “Cesar Macao”, “Raprap” at “Onyok”.

Bukod sa tinamong mga saksak, nakabalot pa ng packaging tape ang mukha ng biktima na may nakapatong na kulay puting tuwalya. Nakagapos din umano ang mga kamay nito.

Sabi ni PO2 Jogene Her­nandez, maaring sa ibang lugar pinaslang ang biktima, tulad ng ilang biktima ng salvaging at itinapon lamang sa lugar para iligaw ang kanilang pagsisiyasat.

Sa imbestigasyon, dakong alas-2:00 ng madaling-araw nang  madiskubre ng dalawang saksing binatil­yo ang biktima habang naglalakad sa gilid ng kalsada sa kahabaan ng Edsa sa kanto ng NIA Road, Brgy. Pinyahan, sa lungsod.

Hinala ng mga awtoridad na posible umanong kapapatay lamang ng biktima  bago ito nadiskubre  dahil sariwa pa umano ang dugo na umaagos mula sa mga sugat ng saksak nito sa kanyang dibdib.

Patuloy naman nagsa­sagawa ng follow-up investigation ang mga awtoridad para matukoy ang pagkakakilanlan ng biktima at ang posibleng may kagagawan ng krimen.