11 kabahayan nilamon ng apoy

MANILA, Philippines – Tinatayang aabot sa P.3 milyong halaga ng ari-arian ang naabo makaraang masunog ang 11 kabahayan sa Brgy, Pasong Tamo sa Quezon City kahapon ng madaling-araw.

Sa ulat na nakarating kay P/Supt. Jesus Fernandez, nagsimula ang sunog sa bahay ni Herminio Enfiesta sa panulukan ng Himalayan Road sa San Labrador Compound bandang alas-3:44 ng madaling-araw.

Sinasabing nawalan ng kuryente sa nasabing lugar at naiwang kandila na natumba kaya kumalat ang apoy sa ilang kabahayan. Gawa lamang sa light materials ang bahay kaya mabilis kumalat ang apoy at nadamay ang iba pang bahay.

Umabot sa ikalawang alarma ang sunog bago tuluyang naapula bandang alas-4:30 ng madaling-araw.

Wala namang iniulat na nasaktan sa sunog habang patuloy ang imbestigasyon.