7-month old baby, patay sa sunog

MANILA, Philippines – Patay ang isang pitong buwang gulang na sanggol matapos ma-suffocate habang nasusunog ang kanilang tinitirhan kamakalawa sa Muntinlupa City.

Alas-6:15 ng gabi, idineklarang dead-on-arrival sa Ospital ng Muntinlupa ang biktimang si Shamir Syron San Juan matapos itong ma-suffocate sanhi ng ma­kapal na usok sa naganap na sunog.

Base sa report na natanggap ni Supt. Roderick Aguto, Muntinlupa City Fire Marshall, naganap ang insidente alas-5:20 ng hapon sa Purok 1, Brgy. Buli ng naturang lungsod.

Ayon sa pagsisiyasat ni SFO2 Rodolfo Aguilar, bigla na lamang nagliyab ang na­turang bahay na pag-aari ni Robert San Juan.

Dahil sa makapal na usok,  nagawa pa ring makuha ang sanggol mula sa naturang nasusunog na bahay ng kanyang mga kaanak at ka­agad itong dinala sa naturang pagamutan subalit hindi na ito umabot ng buhay.

Faulty electrical wiring ang hinihinalang dahilan sa  pagsiklab ng apoy na umabot sa ikalawang alarma.