Trike driver itinumba ng 4 na rider
MANILA, Philippines - Bulagta ang isang tricycle driver makaraang pagbabarilin ng apat na kalalakihang sakay ng tig-isang motorsiklo sa lungsod Quezon, iniulat kahapon.
Ayon kay PO2 Louie Serbito, nakilala ang nasawi na si Johnny Bonifacio, 38, ng 7 Phase 2, Purok 1, Payatas sa lungsod.
Pawang nakasuot ng helmet ang mga suspect na mabilis na tumakas matapos ang isinagawang krimen.
Nangyari ang insidente sa may kahabaan ng Aklan St., Block 7, Phase 3, Lupang Pangako, Payatas B, sa lungsod ganap na ala-1:30 Martes ng hapon.
Sinasabing sakay ng kanyang motorsiklo ang biktima nang biglang sumulpot ang mga suspek at pagbabarilin ito.
Sabi ng isang Ronaldo Avengosa, assistant administrator ng barangay, kasalukuyan siyang nananghalian nang marinig niya ang mga putok ng baril na nagmumula sa labas ng kanyang bahay.
Nang kanyang tignan ang pinagmulan ng putok ay saka niya nakita ang walang buhay na katawan ng biktima habang nakahandusay sa kalye at naliligo sa dugo.
Sa pagsisiyasat ng SOCO narekober sa lugar ang 12 piraso ng basyo ng bala ng kalibre .45 baril at pitong piraso ng basyo ng kalibre .9mm na ginamit sa biktima.
Inaalam pa ng awtoridad ang motibo sa naturang pamamaslang.
- Latest
