Inakalang tiktik ng PNP, itinumba

MANILA, Philippines - Napaslang  ang hinihinalang miyembro ng sindikato ng iligal na droga na inakalang asset ng pulisya matapos itong pagbabarilin ng di-kilalang lalaki kahapon ng madaling araw sa Navotas City.

Nagtamo ng mga tama ng bala sa katawan ang biktimang si Jacquelyn Leongson, 42, ng Block 33 Lot 20 Aries Street sa Barangay San Roque sa nasabing lungsod.

Sa ulat ng Navotas PNP, naglalakad mag-isa ang biktima sa bisinidad ng Fatima Street sa Barangay Daang Hari nang harangin at ratratin.

Bagama’t blangko sa pagkakakilanlan ng gunman dahil sa kawalang-kooperasyon ng mga residente, naniniwala ang pulisya na napagkamalan ng sindikato ang biktima na isang police asset dahil sa palaging kasama ito ng isang police asset.