Pahinante na pumaslang sa ka-lugar, tugis
MANILA, Philippines - Pinaghahanap ngayon ng pulisya ang isang pahinante na sumaksak at nakapatay sa isang lalaki sa isang lamayan, kamakalawa ng madaling araw sa Caloocan City.
Kasabay nito, pinasusuko na ng mga kaanak ng biktimang si Tomas Malicdem ang suspect na nakilalang si Juan Abilar, 50, para panagutan ang nagawang krimen.
Samantala, itinanggi naman ni Arnold, kapatid ng nasawi sa PSN, ang unang naglabasang ulat na sinaksak si Malicdem makaraang biruin ang suspek.
Sinabi nito na kapwa nasa lamay sina Malicdem at Abilar noong madaling araw ng Martes at naglalaro ng pusoy.
Natalo umano si Abilar ngunit hindi nito tinanggap ang pagkatalo at pilit na binabawi ang perang kanyang naitaya. Hindi naman pumayag si Malicdem kaya nagbanta ang suspek na babalikan ito.
Nang bumalik sa lamay, armado na ng itak ang suspek at pinagsasaksak ang biktima saka mabilis na tumakas.
Sinabi ng kaanak na mabait na tao sa kanilang lugar ang biktima at marami na itong natulungan kaya masakit sa kanila ang pagkawala nito.
- Latest
