Bus nagliyab sa EDSA

MANILA, Philippines - Lumikha ng matinding pagbubuhol sa daloy ng trapiko sa EDSA-Ayala sa Makati City ang isang bus na biglang nagliyab, kahapon ng tanghali.

Ayon kay Charlie Nosares ng Metropolitan Manila Development Authority (MMDA) Traffic Control, isang bus ng Cher Transit na biyaheng Navotas-Pacita ang nasunog sa bahagi ng northbound lane ng EDSA malapit sa Ayala Avenue dakong alas-11:14 ng umaga.

Masuwerte namang walang nasugatan o nasaktan sa insidente nang agad na makababa ang mga natakot na mga pasahero.  Dakong alas-11:40 na ng tanghali nang maapula ang apoy.

Ngunit tumindi ang pagbubuhol ng trapiko na umabot ng hanggang Magallanes.

Patuloy namang iniimbestigahan ng MMDA ang insi­dente kung saan hinihinalang electrical problem ng sasakyan ang pinagmulan ng pagliyab.