‘No Clean-up, No Proclamation’ sa mga kandidato -- MMDA

MANILA, Philippines - Planong ipanukala ng Metropolitan Ma­nila Development Autho­rity (MMDA) sa Commission on Elections (Comelec) na magpa­labas ng polisiya na “no-clean up, no proclamation” para sa mga kandidato na tatakbo sa mga susunod na halalan.

Sinabi ni MMDA Chairman Francis Tolentino, na muli siyang dudulog kay Chairman Sixto Brillantes ma­­karaang muling tu­­mambad ang tone-toneladang basura na iniwan ng mga kandidato at kanilang mga tagasuporta sa mga paaralan at mga presinto.

Kailangan umano na magkaroon ng pag­kukusa ang lahat ng kandidato sa pagwalis sa kanilang mga ba­­sura tulad sample ballots na ipinamimigay sa mga bukana ng mga paaralan, mga ikinabit na mga tarpaulin lalo na ang mga idinikit na mga posters na pinakamahirap tanggalin.

Bukod dito, ipinanukala rin ni Tolentino na hingian ng Come­lec ng “cash bond” ang mga kandidato na hindi iba­balik kapag hindi nilinis ng mga ito ang mga basura at campaign materials nila makaraan ang halalan.

Isinagawa ni Tolen­ tino ang mga rekomen­dasyon kahit na ibinasura ng Korte Suprema ang inirekomenda nila sa Comelec na ekstensyon ng “liquor ban”.

Kahapon, inumpi­sahan na ng mga tauhan ng MMDA ang paglilinis sa mga pre­sinto, pader at mga kalsada.Binabasa muna ng tubig ang mga posters na nakadikit sa mga pader bago baklasin ang mga ito. Plano ng MMDA na i-recycle ang ibang mga campaign materials na mapapakinabangan pa upang hindi makadagdag sa basura ng Kamaynilaan.

Sinabi rin ni Tolentino na sinadya nilang piliin muna na unahing linisin ang mga lugar o lungsod na nagkaroon na ng proklamasyon ng mga nanalo upang hindi mapulaan ng pamomolitika.

Bukod sa mga tumakbong politiko, na­na­­wagan ang MMDA sa mga opisyal ng barangay at sa publiko na magtulungan sa paglilinis sa mga paaralan lalo na at nalalapit na ang pasukan sa dara­ting na Hunyo.