Award sa parak na inatake sa puso sa paghabol sa snatcher

MANILA, Philippines - Ginawaran kahapon  ng posthumous award ni  NCRPO Chief P/Director Leonardo Espina ng ‘posthumous award’ ang   pulis na namatay sa atake sa puso sanhi ng sobrang pagod sa paghabol sa naarestong snatcher sa lungsod ng Maynila.

Ang parangal ay per­sonal na iginawad ni Espina sa pamilya ng na­sawing  si PO1 Edgar Valdez Jr. sa burol nito sa kanyang tahanan sa  Sitio Uno St. Sangandan, Caloocan City.

“Buong pusong ipinagmamalaki at pinara­rangalan ng NCRPO ang kadakilaang ipinamalas ni PO1 Edgar Valdez Jr. hanggang sa hu­ling sandali ng kanyang buhay, ipinagmalasakit ang kapakanan ng ating mamamayan,” pahayag ni Espina.

Si Valdez, kasama si PO2 Ulysses San Diego­ na kasalukuyang nagpapatrulya ay nagresponde sa paghingi ng tulong ng biktimang si Roselle Villamar noong Abril 8 matapos ma-snatch ang cellphone nito.

Dahil sa paghabol ni Valdez ay nasakote ang suspek na si Aries Ovilla­, 20, at narekober ang tina­ngay nitong cellphone sa biktima. Gayunman, pagda­ting sa kanilang himpilan ay dumaing ng paninikip ng dibdib si PO1 Valdez matapos itong mapagod sa paghabol sa suspect na bagaman nagawa pang maisugod sa UERM Hospital ay  idineklara ng dead-on-arrival.