Petisyon ng MMDA, aprub sa COMELEC: Campaign motorcade sa 18 kalsada sa MM, bawal na

MANILA, Philippines - May 18 pangunahing kalsada sa Metro Manila  ang hindi na papayagang pagsagawaan ng motorcade rally ng mga nangangampanyang politiko, ayon sa Metropolitan Manila Development Authority (MMDA).

Ito’y matapos aprubahan ng Commission on Election (COMELEC) ang naging petisyon  ni MMDA Chairman Francis Tolentino kaugnay sa umano’y dulot na matinding trapik ng mga motorcade ng mga kandidato.

Kinatigan ng COMELEC ang  petisyon  kung saan kabilang sa ipagbabawal na dumaan ang campaign motorcade ay sa EDSA Avenue, C-5 Road, Quezon Avenue, Common­wealth Avenue, España Boulevard, Marcos Highway, E. Rodriquez Sr. Avenue,  Aurora Boulevard , Ramon  Magsaysay Avenue, President  Quirino Avenue, Ortigas Avenue, Shaw Boulevard, NAIA  Road, Domestic Road, Roxas Boulevard,  Araneta  Avenue, A.H. Lacson St., Rizal Avenue  at Bonifacio Avenue.

Ayon sa COMELEC, agad nilang ilalabas ang opisyal na resolution sa  mga susunod na araw.

Nabatid, na naunang sinabi ni Tolentino na kung may COMELEC resolution na ang kanilang petition ay hindi lamang traffic citation ticket ang magiging penalty ng mga lalabag,  kundi magkaroon ng penalty para sa disqualification ng kandidatong lumabag.

“Gusto lang po namin maging maluwag ang daloy ng trapiko sa mga nabanggit na kalsada dahil pagdoon sila dumaan ay aasahan na ang pagsisikip ng trapiko. Maraming mga motorista ang magagalit,” ani pa ni Tolentino.