Lalaki tumalon mula 29th floor, lasog

MANILA, Philippines - Lasog ang isang hindi pa nakikilalang lalaki na umano’y tumalon mula sa ika-29 na palapag ng isang gusali sa Makati City kamakalawa ng gabi.

Patuloy na inaalam ng pulisya ang pagkakakilanlan sa biktima makaraang bumagsak buhat sa tuktok ng Asian Mansion 2 condotel na nasa kanto ng Dela Rosa at Nieva Street, Makati City dakong alas-10 kamakalawa ng gabi.

Sa salaysay ng security guard na si Robert Bernarte, unang nakarinig sila ng pagputok at sandaling nawalan ng kuryente.   Pagbalik ng ilaw, dito bumulaga ang biktima na wala nang buhay sa kalsada sa tapat ng gusali.

Nabatid na may nagaganap  na pagpupulong ng asosasyon ng mga tenants sa gusali nang maganap ang insidente.  Hindi umano residente ng naturang gusali ang biktima na hinihinalang basta na lamang umakyat sa penthouse na nasa ika-29 na palapag at saka tumalon.

Sumabit pa muna ang biktima sa “high-tension wire” na may 24,000 boltahe ng kuryente na sanhi ng narinig na pagsabog.  Naputol ang kanang braso ng biktima dahil sa lakas ng boltahe ng kuryente saka diretsong nalaglag ang biktima.