Pinagnakawan din UE employee ginahasa na, pinatay pa

MANILA, Philippines - Pinaniniwalaang ginahasa muna bago pinatay sa pamamagitan nang pagsakal ang isang 42-anyos na senior clerk ng  University of the East (UE) sa loob ng inuupahang kuwarto sa Sampaloc, Manila kamakalawa ng hapon.

Batay sa imbestigasyon ng pulisya, may marka ng  sakal ng  sinturon  si Rowena Calo, dalaga, senior clerk sa Guidance Councelor Office  ng University of the East (UE) at residente sa Negros St., Sampaloc, Manila na sinasabing ilang  oras na ring patay nang  matagpuan.

Pinaghahanap naman ng pulisya ang suspect na si PJ Romero, 29, katabing kuwarto ng biktima na tumakas ma­tapos ang insidente.

Sa report ni Det. Lester Evangelista ng Manila Police District (MPD)-Homicide section, dakong alas-4:30 ka­makalawa ng hapon nang madiskubreng patay ang biktima sa loob ng inuupahang kuwarto.

Ayon kay Rizza, kapatid ng biktima, huli niyang nakitang buhay ang kapatid dakong alas-7:30 kamakalawa ng umaga kung saan iniwanan niya ito upang pumasok sa trabaho.

Gayunman, dakong alas-12:00 ng tanghali nang tinawagan si Rizza ng kasamahan sa trabaho ng kanyang ate at tinatanong kung bakit hindi ito pumasok. Agad namang nakisuyo si Rizza sa pinsang si Ronald Aquino na puntahan ang biktima sa bahay at tanungin kung bakit hindi pumasok.

Subalit naka-lock ang  pinto­ ng biktima nang duma­ting si Aquino kung saan na­kita nila ang huli na naka­tihaya at walang saplot sa kanyang kama.

Dito na sapilitang  binuksan ang kuwarto ng biktima kung saan nakitang tinakpan ito ng unan sa mukha at ari at napupuluputan ng sinturon ang leeg nito.

Wala naman sa inuupahang kuwarto nito ang suspect nang puntahan  ng mga awtoridad at tanging hubad na larawan ng mga babae ang nakita.

Nawawala rin ang P15,000 cash at apat na cellphone ng biktima. Nagsasagawa naman ng follow-up operation ang mga awtoridad.