Bading na ‘Ativan’, timbog
MANILA, Philippines - Arestado ang isang bading na pinaniniwalaang miyembro ng ‘Ativan gang’ matapos itong mambiktima ng isang binata sa pamamagitan ng social networking kahapon ng umaga sa Pasay City.
Kinilala ang suspek na si Palermo Binondo, alyas George, 43, residente ng Filrites Avenue, Remavelle Subdivision, Las Piñas City.
Nakumpiska mula sa suspek ang apat na bote ng Tanduay Ice, 20 piraso ng condom, mga tabletang pampatulog at iba’t ibang uri ng droga na ginagamit nito sa pambibiktima.
Kinilala naman ang biktima nito na si Andrew Saluta, 22, binata, taga- Barrio Obrero, Tondo, Maynila.
Ayon sa imbestigasyon ng Pasay City Police, dakong alas-7:45 ng umaga nadakip ng mga pulis ang suspek na si Binondo sa harap ng isang fastfood, sa may Sunset Drive sa isang mall sa nabanggit na siyudad matapos nitong biktimahin si Saluta sa pamamagitan ng social networking at niyaya nito ang biktima sa Longwood Hotel, sa F.B. Harrison ng naturang siyudad.
Nabatid na pinainom ng suspek ang biktima ng Tanduay Ice na may halong droga hanggang sa nawalan ito ng malay.
Tinangay ng suspek ang mahahalagang kagamitan ng biktima, tulad ng laptop at mga pera.
Matapos ang insidente ay nagtungo ang biktima sa Pasay City Police, na nagresulta sa pagkakadakip sa nabanggit na suspek.
- Latest
