MANILA, Philippines - Makaraang mabigo na sugpuin at umano’y manguna ang Maynila sa mga lungsod sa kaso ng carnapping, sinibak ni Manila Mayor Alfredo Lim ang hepe ng Anti-Carnapping ng Manila Police District (MPD) kahapon.
Ang sinibak ay si Chief Inspector Ariel Caramoan.
Ayon kay Lim magsasagawa siya ng balasahan ng mga station commander at maging hepe ng mga division dahil hindi umano siya kuntento sa mga ginagawa ng mga opisyal.
Ayon kay Lim, kailangan na pagtuunan ng pansin ng mga kapulisan ang iba’t ibang uri ng kriminalidad upang mabigyan ng proteksiyon ang publiko.
Sa kaso naman ng pananaksak sa UST student, inatasan din ni Lim si Supt. James Afalla, hepe ng MPD Station 4 na arestuhin at sampahan ng kaukulang kaso ang anim na FEU students na sumaksak dito sa loob ng FEU campus.
Samantala, pinuri naman ni Lim ang ginawang pagdakip ni Manila Department of Social Welfare, head Jay R. dela Fuente sa mga solvent boys sa paligid ng Blumentritt.