Manila, Philippines - Napatay ang 38-anyos na American national matapos itong pagbabarilin ng mga di-kilalang kalalakihang holdaper na nanloob sa convenience store sa Malate, Maynila kahapon ng hapon.
Hindi na umabot ng buhay sa San Juan de Dios Hospital ang biktimang si Robert Armstrong.
Samantala, nakatakas naman ang mga armadong holdaper.
Sa ulat ni PO3 Alonzo Layugan kay P/Senior Insp. Joselito de Ocampo, hepe ng Manila Police District-Homicide Section, bandang alas-2 ng hapon nang pasukin at holdapin ang 7-11 convenience store sa panulukan ng Vito Cruz at F.B. Harrison Street sa tapat ng gasolinahan.
Nabatid sa ulat na tatlo sa suspek ang pumasok sa loob ng nasabing tindahan na nagdeklara ng holdap at dalawa ang nagsilbing lookout sa labas.
“Yung biktima kustomer din siya, mga sampu raw lahat ang kustomer nang holdapin. Yung mga holdaper naman dalawa lang ang sinasabing nakamotorsiklo na nakita kasi nagpanggap na kustomer ang tatlo na armado at nangholdap,” ani Layugan.
Nataranta ang ilang kustomer ng 7/11 store na nakapasok sa loob ng opisina nito habang nililimas ng mga suspek ang pera sa kaha .
Ang kustomer na Kano umano ay biglang lumabas at tinungo ang kaniyang sasakyang Mazda na kulay asul kung saan binaril ng mga suspek habang nagbubukas ng pintuan ng kaniyang kotse.