MANILA, Philippines - Problema sa kakapusan ng kinita ang nagtulak sa isang negosyante upang kitlin ang sarili sa pamamagitan ng pagbibigti sa loob ng kanilang bahay sa lungsod Quezon, kahapon.
Si Tony del Mundo, 49, ay natagpuan na lang na nakabitin ng kanyang asawa sa window grills ng kanilang kuwarto na matatagpuan sa Pipit St., Brgy. Commonwealth sa lungsod.
Nagawa pa siyang itakbo sa FEU Hospital pero idineklara ring dead-on-arrival ganap na alas-8:54 ng umaga.
Ayon sa pulisya, water refilling station ang negosyo ng biktima at ng misis nitong si Susan, 51.
Tatlumpung minuto bago madiskubre ang nakabiting si del Mundo ay nakausap pa ito ng kanyang misis saka lumabas ang huli para buksan na ang kanilang negosyo.
Sinabi ni Susan sa mga imbestigador, nitong nakalipas na araw ay nagkaroon ng problema ang biktima dahil sa maliit na benta ng kanilang negosyo.
Nabatid na kukunin na sana ng kasambahay ang labada sa kuwarto ng mag-asawa ng mabatid na nakakandado ito na sinabi naman sa misis. Sa pagbukas ng kuwarto ay doon tumambad ang nakabigting biktima. Wala namang iniwang suicide note ang nagpakamatay na mister.