MANILA, Philippines - Tanggal ang tenga ng isang empleyado ng Mandaluyong City Hall makaraang tigpasin ng itak ng kanyang kuya kamakalawa ng gabi.
Ang biktima ay nakilalang si Jerry Gayanes, 41, habang ang suspek ay ang nakatatanda nitong kapatid na si Larry, 44, binata, at kapwa nakatira sa Block 22, Welfareville Compound, Brgy. Addition Hills, ng nasabing lungsod.
Nabatid mula kay SPO1 Marlon Climacosa ng Criminal Investigation Unit, dakong alas-9:30 ng gabi naganap ang insidente sa tapat ng tahanan ng magkapatid.
Ayon sa report, inawat ng biktima ang suspek dahil nagwawala ito, nagsisigaw at naghahamon ng away sa kanilang mga kapitbahay pero siya ang pinagbalingan ng galit.
“Hinataw niya ako ng hawak niyang itak, mabuti na lamang at nakailag ako kaya ang tenga ko ang natigpas at hindi ang aking ulo,” anang biktima.
Matapos ang insidente ay mabilis na tumakas ang suspek habang ang biktima ay agad na isinugod sa Mandaluyong City Medical Center.