MANILA, Philippines – Rehas na bakal ang binagsakan ng dalawang kalalakihan na sinasabing nanghoholdap ng mga bading sa loob ng mga mall matapos madakma ng mga operatiba ng Quezon City Police District-Criminal Investigation and Detection Group sa Quezon City, iniulat kahapon.
Kinilala ni P/Chief Insp. Rey Magdaluyo ang mga suspect na sina Jonathan Lagadiya at Mark Cahuyan.
Sinabi ng opisyal, ang mga suspect ay naaresto base sa reklamo ng ilang biktima sa Robinson’s Galleria.
Isiniwalat ng ilang biktimang bading na tinakot sila ng mga suspek na iiskandaluhin kapag hindi ibinigay ang alahas na suot at cash.
Gayon pa man, isa sa biktima ang nakahingi ng tulong sa mga security guard ng mall kung saan ipinaaresto ang mga suspect.
Sa presinto, itinanggi naman ng mga suspect ang akusasyon ng mga biktimang bading.
Binalewala naman ng CIDG ang alibi ng mga suspect dahil sa estilo ng kanilang modus operandi na ilang ulit nang naaresto sa kahalintulad ng kaso.
Pangunahing modus ng dalawa na takutin ang biktima na iiskandaluhin na may naganap na sex sa cubicle sa loob ng palikuran.
Sa takot ng biktima na mapahiya ay mapipilitan na lang itong ibigay ang hinihingi ng mga suspect.