MANILA, Philippines - Hindi na makakapagdiwang ng kanyang nalalapit na kaarawan ang isang 8-anyos na batang lalaki matapos itong magulungan at mapisak ng isang pampasaherong bus sa loob ng isang terminal sa Caloocan City kamakalawa.
Dead-on-arrival sa Manila Central University (MCU) Hospital ang biktimang si Rondave Suarez, ng Brgy. Binuangan, Obando, Bulacan.
Nasa custody naman ng pulisya ang suspek na si Rosalio Lupio, 41, taga-Cabangan Zambales, driver ng Nissan Bus (CVP-434) na pag-aari ng Victory Liner.
Sa report na nakarating kahapon sa Caloocan City Traffic Enforcement Unit, naganap ang insidente dakong alas-3:00 ng hapon sa terminal ng Victory Liner na matatagpuan sa Monumento, Caloocan City habang naglalakad ang biktima kasama ang ina at ilang kamag-anak nang mabundol ng naturang bus.
Nabatid na nagulungan ang biktima ng unahang gulong ng bus dahilan upang mabilis itong isugod sa nasabing ospital subalit hindi na umabot ng buhay. Sumuko naman sa pulisya ang suspek na si Lupio.
Nabatid na magdiriwang ng kaarawan ang paslit ngayong Marso 26, 2012 kung saan hiling pa nito na muli silang kumain sa isang fastfood chain subalit hindi na ito matutupad dahil sa sinapit nitong trahedya.