MANILA, Philippines - Tuluyang bumigay ang katawan ng isang 27-anyos na lalaki matapos makuryente sa nahawakang bakal sa pampublikong paaralan sa Paco, Maynila kamakalawa ng hapon.
Namatay sa Sta. Ana Hospital ang biktimang si Felomino Diomeda, stay-in employee sa Manuel Roxas High School sa Pres. Quirino Avenue sa nasabing lugar.
Sa ulat ni SPO1 Ramir Dimagiba ng Manila Police District-Homicide Section, dakong alas-3 ng hapon nang maganap ang insidente habang may kinukumpuni ang biktima sa eskwelahan.
Lumilitaw na aksidenteng nahawakan ng biktima ang bakal na may nakakabit na linya ng kuryente habang bumubuhos ang malakas na ulan.
Nangisay ang biktima at nakahingi pa ng saklolo sa kasamahan na nagsugod sa kanya sa ospital subalit hindi rin nagtagal ay namatay ito.