MANILA, Philippines - Isang bangkay ng ’di-pa nakilalang lalaki ang natagpuang nakahalo sa mga basurang hinigop ng pumping station sa Muelle de Binondo sa Maynila, kahapon ng umaga.
Agnas na ang bangkay na inilarawang nasa 25-35 anyos, 5’2’’ hanggang 5’4’’ ang taas, maiksi ang buhok, kayumanggi, nakasuot ng dilaw na sando at sky blue ang short pants.
May kuwintas ding beads na violet at may krus, may 5 rubberized na bracelets sa kaliwang kamay at 3 iba pa sa kanan.
Sa ulat ni SPO2 Benito Cabatbat, dakong alas-8:15 ng umaga nang maispatan ng tauhan ng MMDA-Binondo Pumping Station ang bangkay na lumulutang sa ilog kaya kaagad na ipinagbigay-alam sa Philippine Coast Guard.
Posibleng ipinadpad lamang ang bangkay at lumulutang sa Pasig River hanggang sa mahigop papasok sa erya ng pumping station, kasabay ang mga basura.