MANILA, Philippines - Nasawi ang isang tricycle driver matapos itong barilin ng kanyang pasahero nang magtalo ang mga ito sa ibinayad na pamasahe ng huli kamakalawa ng gabi sa Valenzuela City.
Dead-on the-spot sanhi ng isang tama ng bala ng baril sa ulo ang biktimang si Lister Batara, 27.
Mabilis namang tumakas ang suspect matapos ang isinagawang pamamaril sa biktima.
Dakong alas-10:00 ng gabi nang maganap ang insidente nang sumakay ang suspek sa tricycle ng biktima at nagpahatid sa delos Reyes St., Brgy. Gen T. de Leon, ng nabanggit na lungsod.
Pagdating sa naturang lugar, binayaran ng suspek ang biktima, subalit kulang umano ang ibinigay nito na naging dahilan upang umangal si Batara hanggang mauwi sa pagtatalo ang mga ito.
Bigla na lamang bumunot ng dalang baril ang suspek at pinutukan sa ulo ang biktima saka mabilis na tumakas.