MANILA, Philippines - Isa na namang insidente ng carjacking ang naganap sa Makati City makaraang isang taxi ang sapilitang tinangay ng tatlong hindi kilalang kalalakihan kahapon ng umaga.
Sa imbestigasyon ng Makati City Police, naganap ang insidente dakong alas-2:38 ng umaga sa kahabaan ng Kalayaan Avenue, Brgy. Cembo, ng nabanggit na siyudad.
Nabatid na habang minamaneho ng driver na si Evaristo Bagtasos, ang taxi na Toyota Vios na kulay puti (UVM-575) ay bigla itong pinara ng tatlong kalalakihan. Nang huminto si Bagtasos ay dito na siya tinutukan ng mga suspek hanggang sa sapilitang kinuha ang dala nitong taxi. Matapos ito ay kaagad na inireport ni Bagtasos ang insidente sa Makati City Police at ilang oras lamang, nakatanggap ng tawag ang naturang tanggapan na isang taxi ang narekober sa lungsod Quezon at napag-alaman na iyon ang taksing dala ni Bagtasos.