MANILA, Philippines - Isa na namang family driver ang nasugatan matapos hatawin sa ulo ng ilang kalalakihan na puwersahang tumangay sa minamaneho niyang SUV kamakalawa ng gabi sa Makati City. Kinilala ang sugatang driver na si Ismael Vargas, 35, ng Brgy. Guadalupe, Makati City. Sa sketchy report ng pulisya, naganap ang insidente dakong alas-11:00 ng gabi sa kahabaan ng F. Yabut St., Brgy. Guadalupe Nuevo ng nabanggit na siyudad. Sa pahayag ng biktima nagkakarga siya ng spare tire sa minamaneho niyang Toyota Innova nang bigla na lamang sumulpot sa likuran niya ang isang grupo ng kalalakihan. Tinutukan at hinataw umano siya ng baril sa ulo ng mga ito at saka puwersahang tinangay ang dala niyang sasakyan. Kaagad na ipinagbigay alam ng biktima sa Anti-Carnapping Unit ng Makati City Police ang insidente at nagsasagawa pa ng follow-up operation.