MANILA, Philippines - Napatay sa sakal at saksak ang isang 37-anyos na ginang ng sariling biyenang lalaki sa Sta. Ana, Maynila, kamakalawa ng gabi.
Ayon kay Insp. Armand Macaraeg, hepe ng Manila Police District-Homicide Section ang biktima ay kinilalang si Mary Jane Maceda, ng Oro B St., Sta. Ana, Maynila, habang ang biyenang suspect na naman ay tinukoy na si Rodolfo Maceda, 62, na tumakas matapos ang insidente.
Sa imbestigasyon, dakong alas-8:00 ng gabi nang pasukin ng lasing umanong suspect ang biktima sa loob ng silid nito, kung saan sinakal at sinaksak pa sa kanang bahagi ng balikat matapos ang maikling komprontasyon.
Sinabi ng anak ng biktima na si Jaybee, 11, nasa kuwarto sila ng kaniyang ina at nakababatang kapatid na babae nang biglang pumasok ang kanilang lolo at maganap ang insidente.
Una umanong nakita ni Jaybee na sinasakal ang kaniyang ina at nakita niya na may dugong umaagos mula sa katawan nito bago bumulagta sa kama habang ang lolo ay nagmamadaling umalis.
Isinugod pa sa Sta Ana Hospital ang biktima subalit idineklarang dead on arrival, dakong alas-8:45 ng gabi.
Hindi pa natukoy ang dahilan ng komprontasyon na nauwi sa pagpatay sa biktima.
Nabatid na ang mister ng biktima (anak ng suspect) ay nagtatrabaho sa ibayong dagat.