MANILA, Philippines - Mala-Pacman na suntok ang pumatay sa isang 39-anyos na barker buhat sa nakatalo nitong driver kahapon ng umaga sa Malabon City.
Binawian ng buhay habang nilalapatan ng lunas sa Tondo Medical Center ang biktimang si Teofisto Manalastas, ng Aves Compound, Sangandaan, Caloocan City.
Pinaghahanap naman ng pulisya ang suspek na Arnulfo Lepiten Jr., 34, ng Pacencia St., Brgy. Tugatog, Malabon.
Dakong alas-11:30 ng umaga nang maganap ang insidente sa Caltex gasoline station na matatagpuan sa kahabaan ng M.H. del Pilar, panulukan ng Gov. Pascual Avenue ng nabanggit na barangay.
Ayon sa ulat, kasalukuyang nagtatawag ng pasahero ang biktima nang dumating ang suspek na nakigulo sa ginagawa ng una dahilan upang magtalo hanggang sa nauwi sa relihiyon ang argumento ng dalawa na lalong kapwa uminit ang damdamin.
Dito na nagmistulang ala- Pacman ang suspek nang suntukin nito ng malakas ang biktima, dahilan upang matumba ito at mabagok ang ulo sa semento.
Dali-daling dinala sa nabanggit na pagamutan ang biktima ng ilang taong naroroon, samantalang ang nabanggit na suspek ay mabilis na tumakas.