Manila, Philippines - Binurdahan ng saksak hanggang sa mapatay ng hindi pa kilalang suspect ang isang retiradong pulis na suma-sideline bilang tricycle driver kahapon ng madaling- araw sa Quezon City.
Ang biktima ay nakilalang si Ginsano Tutor, 58, ng Ama St., Sitio Mendez, Brgy. Baesa, Quezon City, na dating nakatalaga sa Caloocan Police.
Batay sa pahayag ng asawang si Virginia, huling nakita ang biktimang nakikipag-inuman umano sa ilang teenager sa may M. de Jesus St. sa nasabing lugar pasado alas-2 ng madaling- araw.
Sinabihan pa umano niya ito na umuwi na dahil gabing-gabi na pero hindi nagtagal nabalitaan na lamang niyang sinaksak ang biktima.
Ayon sa pamangkin ng biktima nakita niya ang kanyang tito na sinaksak ng hindi niya nakilalang lalaki.
Ang kasong ito ay patuloy na iniimbestigahan ng QC police.