Manila, Philippines - Isang 10-anyos na batang lalaki ang ginulpi ng kanyang sariling ina dahil lamang sa pagbili ng sitserya kahapon ng tanghali sa Caloocan City.
Latay ang buong katawan dahil sa gulping tinamo ng biktimang si John Leo Sogilon, 10, ng Dagat-dagatan ng lungsod na ito. Nasa kustodiya na ito ng DSWD.
Inaresto naman ang ina ng biktima na si Rita, 30. Nabatid na tatlong araw na ang nakalilipas ay hindi pa umuuwi ang tatay ng totoy na construction worker sa ibang lugar na naging dahilan upang kapusin ng pagkain ang mag-iina.
Dakong alas-12 ng tanghali, nagbenta ng martilyo si Rita at binigyan ng P15 ang anak upang ibili ng kanilang makakain.
Pag-uwi ng biktima ay sitserya ang dala nito na naging dahilan upang uminit ang ulo ng suspek at kinuha ang stick na kawayan at walang humpay na pinagpapalo ang anak. Dahil sa palahaw ng iyak kaya ito nakita ng nga kapitbahay na nagsumbong sa barangay dahilan upang dakpin ang ina ng biktima.