MANILA, Philippines - Nagkalasug-lasog ang katawan ng isang 80-anyos na lolo makaraang mabundol ng isang truck habang siya ay papatawid sa isang U-turn slot sa lungsod Quezon, ayon sa pulisya kahapon.
Sa ulat ng Traffic Sector 1 ng Quezon City Police District, nakilala ang biktima na si Teresito Valdez, ng G. Marvex Drive, Brgy. Balingasa sa lungsod.
Hawak ng pulisya ang driver ng truck na nakilalang si Edgar Bulay, 41, ng C-F Natividad St., Mapulang Lupa, Valenzuela City na nakatakdang sampahan ng kasong reckless imprudence resulting in homicide.
Sa pagsisiyasat, nangyari ang insidente sa may A. Bonifacio Drive corner Marvex drive U-turn slot, Brgy. Balingasa ganap na alas-11 ng umaga. Tumatawid umano ang biktima sa naturang lugar nang biglang bundulin ng rumaragasang truck na minamaneho ni Bulay.
Matapos mabundol, nasagasaan pa umano ng truck ang biktima sanhi upang matinding pinsala ang tamuin nito na naging dahilan ng agaran nitong kamatayan.