MANILA, Philippines - Bangkay na nang matagpuan ang isang 12-anyos na binatilyo sa isinagawang search and rescue operation ng mga awtoridad matapos na mawala ito sa lawa ng La Mesa Dam habang lumalangoy kasama ang ilang kaibigan sa lungsod Quezon.
Ang biktima ay kinilalang si Virgilio Elicano, 1st year high school at residente sa No. 09 Upper Molave, Paya tas ng nabanggit na lungsod.
Sa ulat ni SPO2 Rodel Dapat ng Criminal Investigation and Detention Unit ng Quezon City Police, ganap na alas-10:15 kamakalawa ng umaga nang matagpuan ng mga rescuer ang biktima sa may Golden Summer La Mesa Dam, Payatas.
Lumilitaw na Biyernes pa lamang ng umaga nang magpunta ang biktima kasama ang ilang kaibigan sa nasabing lugar para maligo.
Pasado alas-3 ng hapon nang mapansin ng grupo ang dahan-dahang paglubog sa tubig ng biktima.
Dahil dito, agad nilang ipinagbigay alam ang nasaksihan sa mga magulang ng biktima na siya namang nagpa-abot ng impormasyon ng Batasan Police Station ng QCPD.
Mabilis namang nagtungo ang mga rescuer sa lugar mula sa Maritime at Coast Guard at nagsagawa ng rescue at retrieval operation.