MANILA, Philippines - Nadakip sa isinagawang pagsalakay ng mga ahente ng National Bureau of Investigation (NBI) ang dalawang pamangkin ni Amin Imam Boratong, ang tinaguriang shabu tiangge operator sa Pasig City, na nahatulan ng habambuhay na pagkabilanggo at isa sa asawa nitong si Sheryl Molera, iniulat kahapon.
Kinilala ni NBI Director Magtanggol Gatdula ang mga suspect na sinasabing pumalit sa ‘trono’ ni Boratong’ na sina Hamem Boratong Panda, 22; at Minerba Boratong Batugan, kapwa ng Pasig City.
Bigo na madakip ang isang Acsaimen Boratong, alyas “Mac-mac”, na sinasabing ‘hitman’ ni Boratong na ginamit na panangga laban sa mga awtoridad ang tatlong anak na babae na nasa edad 4, 5 at 6 upang makatakas.
Bitbit ang search warrant na inisyu ni Judge Amor Reyes ng Manila Regional Trial Court ay isinagawa ang pagsalakay.
Naaktuhan umano ang ginagawang pagbebenta ng mga suspect kung saan nakumpiska kay Panda ang 41.9 gramo ng shabu habang kay Batugan ay 6.9 na gramo.