MANILA, Philippines – Namatay ang isang ginang nang pagsasaksakin ng isang 16-anyos na dalagita na nairita sa ginawang pagkompronta sa kanyang nakababatang kapatid kaugnay sa hindi umano pagsosoli ng hiniram na kawali, sa Ermita, Maynila kamakalawa ng gabi.
Wala nang buhay nang maipasok sa Ospital ng Maynila ang biktimang si Anabelle Bernales, parking attendant, ng 1314 Guerrero St., Ermita sanhi ng mga tama ng saksak sa kanyang katawan.
Tinutugis pa ang suspek na itinago sa pangalang Melissa, ng Bagong Silang, Caloocan City.
Sa ulat ni Det. Jaime Gonzales Jr. ng Manila Police District-Homicide Section, dakong-11 ng gabi nang maganap ang insidente sa harapan ng Amazonia Bar and Restaurant sa 1402 M.H. Del Pilar , corner Sta. Monica sts., Ermita.
Nabatid na pinagalitan ng biktima ang nakababatang kapatid ng suspek na si “Grace” (hindi tunay na pangalan) dahil hindi umano isinoli kaagad ang kawaling hiniram.
Agad namang nagsumbong sa suspek si Grace na masasakit na salita umano ang binitawan ng biktima sa paninita sa kaniya kaya sumugod ang suspek.
Sa salaysay ng testigong si Luzviminda Victao, nakita na lamang niya na hinahabol ng suspek ang duguang biktima habang bitbit ang isang kutsilyo.
Tumakas ang suspek pagkatapos ng krimen.