MANILA, Philippines - Patay ang isang basurero matapos tamaan ng ligaw na bala nang mapadaan ito sa dalawang grupo ng nagrarambulang kabataan habang papauwi sa kanyang bahay sa Brgy. Bagong Silangan sa lungsod Quezon kamakalawa.
Si Alfredo Abcas, 53, ng Area 5, Sitio Veterans, ng nasabing barangay ay nagawa pang maisugod sa FEU hospital ngunit hindi na umabot pang buhay.
Naganap ang insidente sa may Sitio Bakal ng nasabing barangay ganap na alas-5:30 ng hapon.
Sa inisyal na pagsisiyasat ng pulisya, papauwi na umano ang biktima buhat sa pangangalakal nang madaanan nito ang dalawang grupo ng kabataang nagkakagulo at nagpapalitan ng putok. Dahil dito, nasapol ng ligaw na bala sa likuran ang biktima kung kaya agad itong bumulagta sa kalye, habang nagpanakbuhan naman papalayo ang mga nasabing grupo. (Ricky Tulipat)