MANILA, Philippines - Hindi na nakayanan umano ng isang 33- anyos na dalaga ang dinadalang sakit na ulcer na siyang ugat upang masawi ito habang bumibiyahe sakay ng isang bus galing ng Ilo-Ilo patungong Cubao, Quezon City, ayon sa pulisya kahapon.
Ang biktima ay kinilalang si Anadilla Monares ng # 143 M. Dr. Sixto Antonio Avenue, Rosario, Pasig.
Ayon kay PO3 Joselito Gagaza, may-hawak ng kaso, si Monares ay natuklasang wala nang buhay ng kanyang pinsang si Baltazar Monares sa loob ng Valisno Express bus habang nakaparada sa isang terminal sa Cubao bandang alas-3:00 ng madaling-araw.
Sinabi ni Baltazar na kapwa sila pasahero ng nasabing bus nang, pagsapit nila sa terminal at tangkain niyang gisingin ang kanyang pinsan para bumaba, hindi na ito kumikibo hanggang sa malamang wala na itong buhay.
Ayon naman sa kapatid ng biktima na si Nelia Monares, may sakit umano ito na ulcer. (Ricky Tulipat)