MANILA, Philippines - Dalawang kilabot na magnanakaw ang nasawi makaraang makipagbarilan sa mga tauhan ng pulisya matapos na manloob sa isang bahay, kamakalawa ng gabi sa Taguig City.
Isa sa mga suspek ang nakilalang si Rolando Lanzar ng Makati City, habang inilarawan naman ang isa pang nasawi na may suot na abuhing t-shirt na may tatak na bandila ng Estados Unidos, itim na maong na pantalon, at itim na bag at itim na tsinelas.
Sa ulat ng pulisya, dakong alas-5 ng hapon nang pasukin ng dala wang suspek ang bahay ng isang Rodolfo Geronimo, 67, sa Nightingale St., Bay Breeze, Brgy. Hagonoy, Taguig City. Itinali ng mga suspek si Geronimo sa pamamagitan ng charger ng cellphone at saka tinangay ang mga mahahalagang gamit nito. Tinangay rin ng mga suspek ang kuwintas ng kapitbahay na si Arturo Ginez, na dumalaw sa bahay ni Geronimo saka tumakas lulan ng isang Toyota Revo (WMX-753).
Habang binabagtas naman ang kahabaan ng ML Quezon St., Hagonoy, Taguig, nabangga ng sasakyan ng mga suspek ang ilang sasakyan na itinawag naman ng mga driver sa pulisya. Dito rumesponde ang mga tauhan ng Police Community Precinct 4 kasama ang mga barangay tanod na nakipaghabulan sa mga suspek.
Inabandona naman ng mga suspek ang kanilang sasakyan at sapilitang inagaw ang motorsiklo ni Rolando Onay na kanilang minaneho hanggang Dreamland Subdivision, Hagonoy, Taguig. Dito binangga ng mga barangay tanod lulan ng isang kotse ang motorsiklo sanhi upang sumemplang ito. Sa kabila nito, nagawa pa ring hagisan ng granada ng mga suspek ang mga awtoridad kung saan gumanti naman ng putok ang mga pulis sanhi ng kamatayan ng mga suspek.
Narekober sa posesyon ng mga nasawing suspek ang isang kalibre .45, isang kalibre .38, at ang mga mahahalagang gamit na tinangay sa bahay ni Geronimo.