MANILA, Philippines - Dahil sa labis na depresyon makaraang mawalan ng trabaho, ipinasya ng isang 50-anyos na dalaga na magpakamatay sa pamamagitan ng pagbigti sa sarili sa lungsod Quezon kahapon.
Nakilala ang nasawi na si Amor Tan, dating floor manager ng mga clubs sa lungsod at residente ng Masikap corner Maginoo Brgy. Pinyahan sa lungsod.
Ayon sa pulisya, alas-12 ng tanghali nang matagpuan ang bangkay ng biktima habang nakabitin sa kisame ng kanyang tinutuluyan.
Sa inisyal na pagsisiyasat ng awtoridad, masyado umanong dinamdam ng biktima ang pagkawala ng trabaho kung saan hindi na ito nakakabayad ng renta sa bahay.
Sinasabing dati umanong maraming pinaglilingkurang club sa lungsod ang biktima at sa hindi malamang kadahilanan ay natanggal ito na siyang hinihinalang ugat para makaramdam ito ng depresyon. (Ricky Tulipat)