MANILA, Philippines - Isang retiradong pulis ang nasawi nang tambangan ng tatlong hindi pa nakikilalang mga suspek pagkagaling niya sa isang sabungan pauwi ng kanilang bahay kahapon ng madaling-araw sa Potrero, Malabon City.
Binawian ng buhay habang ginagamot sa Manila Central University Hospital sanhi ng tama bala sa tiyan ang biktimang si Retired SPO2 Delson Ferry, 58, nakatira sa Phase 3C, Kaunlaran Village, Caloocan City.
Sa inisyal na imbestigasyon, naganap ang insidente dakong alas-12 ng madaling- araw sa kahabaan ng Araneta Avenue, Brgy. Potrero.
Nakasakay ang biktima, ang kanyang anak at isang Aling Lita sa isang tricycle na minamaneho ni Rogelio Comilos galing sa isang sabungan nang bigla silang hinarang ng mga suspek.
Dalawa sa mga suspek ang agad na lumapit sa biktima at kinuha ang dalang clutch bag nito bago hinatak palabas sa triclycle at binaril.
Matapos ang insidente ay tumakas ang mga suspek sakay ng isang Honda TMX na walang plaka habang dinala naman ang biktima sa naturang pagamutan.
Inaalam na ng mga pulis kung holdap lang ang pakay ng mga suspek o may iba pang motibo sa nasabing insidente kung saan inaalam pa kung magkano ang laman ng clutch bag ng biktima na tinangay ng mga suspek. (Lordeth Bonilla)