MANILA, Philippines - Pinasisibak ng militanteng transport group na Pinagkaisang Samahan ng mga Tsuper at Operators Nationwide (PISTON) si Energy Secretary Angelo Reyes dahil sa pananakot nito at sabihing aabutin na lamang ng 13-araw ang suplay ng produktong petrolyo.
Mistulang tinatakot umano ni Reyes ang hanay ng mga tsuper, mga motorista at mga consumers upang palakasin ang panawagan ng mga oil company na ipatanggal kay GMA ang Executive Order 839 na nagpapahinto na maitaas ang presyo ng produktong petrolyo sa Luzon na sinalanta ng bagyong Ondoy at Pepeng.
Bunsod nito, nanawagan ang Piston sa Malakanyang na patalsikin sa puwesto si Reyes dahil sa ginagawa niyang pananakot sa taumbayan sa halip na gumawa ng solusyon sa inaasahang oil shortage sa bansa.
Nagbanta ng malawakang transport protest caravan ang Piston sa tanggapan ng Big 3, ang Shell, Caltex at Petron para kondenahin ang kanilang pagtangggi sa price control samantalang patuloy ang kanilang kita mula sa Visayas at Mindanao.
Layunin din ng naturang hakbang na igiit na maibasura ang oil deregulation law na siyang ugat ng patuloy na pagtaas ng presyo ng produktong petrolyo.
Nais din ng Piston na palawigin sa Visayas at Mindanao ang implementasyon ng EO 839. (Angie dela Cruz)